Колку пати сте си ветиле дека ќе почнете да вежбате на први во месецот, први наредниот понеделник или некој важен датум во животот, а потоа ќе се откажете по два-три тренинзи?
Веруваме дека за повеќето од вас одговорот е: „Многу“.
Наесен, кога сезоната на годишни одмори е зад нас и има уште време до новогодишните празници, има се повеќе луѓе кои се откажуваат од вежбањето, бидејќи немаат доволно силна мотивација за тренирање.
Доколку и вие спаѓате во таа категорија, прочитајте ги советите кои ќе ви помогнат да останете верни на вежбањето и покрај се.
1. Поставете реални очекувања
Повеќето од оние на кои тренингот не им е дел од секојдневието, почнуваат да вежбаат за да постигнат некоја цел. Бројот на оние кои го прават тоа заради здравје е помал од оние кои сакаат да го трансформираат своето тело и да ослабат вишок килограми.
– Кога си поставуваме нереални цели, полесно е да ја изгубиме мотивацијата да одиме на тренинг.
– Ако планирате дека треба да изгубите 10 килограми за еден месец, ќе останете без мотивација штом ќе стапнете на вагата по два-три тренинзи.
Наместо нереални очекувања, поставете си мали одржливи цели, советува нашиот соговорник.
– Не одете во теретана секој ден, доволно ќе биде да вежбате три пати неделно. Не очекувајте да изгубите килограми за кратко време, а повеќе внимавајте на обемот на половината, надлактиците, колковите и бутовите. Забележете кога вашата гардероба ќе стане поудобна и честитајте си за тоа. Потсетете се колку подобро се чувствувате после тренинг и колку вежбањето позитивно влијае на целокупното здравје – советува Александра.
2. Бидете активни надвор од теретана
Да се туркаме силно во теретана и да докажеме дека можеме подобро, побрзо и повеќе од другите, всушност е лоша услуга за нас самите; ако се однесуваме така, постојат сите шанси да почнеме побрзо да ја прескокнуваме теретаната.
– Вежбањето не значи само доаѓање во теретана, достапно е и дома, во двор, и во парк. Правете вежби за истегнување или тренирајте ги мускулите на стомакот и нозете додека гледате филм, прошетајте низ соседството, трчајте… Важно е физичката активност да стане дел од вашето секојдневие, без оглед на одењето во теретана.
3. Правилото од 10 минути
По работен ден, повеќето од нас се чувствуваат тромо и летаргично, па одењето на тренинг е последното нешто што сакаме да го вклучиме во нашиот распоред. Лежењето на кревет или топла бања звучи многу попримамливо.
– Секој од нас има добри и лоши денови. Кога ќе се појават лошите и немате желба да одите во теретана, ветете си дека барем 10 минути ќе посветите на физичка активност дома. Вклучете ја стоперката и направете неколку рунди од 15 склекови, 15 чучњеви и 15 нишалки со кетел. Некој ќе може да направи само две или три повторувања, а некој ќе направи двојно повеќе. После овој мини-тренинг ќе почувствувате наплив на енергија, но и задоволство што денот не ви помина без ниту една вежба.
